"Иэйии" түмсүү

Олохтоох библиотека иһинэн үлэлиир, "Иэйии" литературнай түмсүү тохсунньу ый 25 күнүгэр бу сыллааҕы үлэлэрин былааннастылар. Бары остуол тула олорон биир дойдулаахпыт, суруйааччы Татьяна Потапова - Татыйык Мыла олоҕун, айар үлэтин кытта билистилэр. Татьяна Иннокентьевна биһиги библиотекабытыгар бэлэх ууммут хоһооннорун хомуурунньугун астына көрдүлэр, хоһооннорун аахтылар. Бэрт сэргэх көрсүһүү кэннэ кинигэ уларсан, астынан тарҕастылар.

Татьяна Потапова - Татыйык Мыла төрөөбүт- үөскээбит сайылыгар анаан суруйбут хоһоонун ааҕаргытыгар.


Онно, сайылыкпар

Онно миигин кэтэһэр,
Олус күндү сайылык,
Оҕо сааспар ыҥырар
Ойор-тэбэр сүүс ыллык.

Онно халлаан үп-үрдүк,
Тула бары сып-сырдык,
Ойуур иһэ сып-сылаас-
Кэрэ эйгэ аһаҕас.

Ойор күнүм тэҥҥэ үөрсэр,
Оҕо буолан оонньоһор,
Онно үрэх кэтэһэр,
Окко кырдал кылыйсар.

Оҕо сааһым ыллыга
Ойуур устун сүүрэрэ,
Отон-дьэдьэн дыргыла
Омуннаахтык үөрдэрэ.

Онно ыалым сайаҕас,
Киһи бары эйэҕэс,
Ааммыт өрүү аһаҕас,
Чэйбит өрүү минньигэс.

Кэрэ сыһыан уйата,
Кыра сааһым туоната,
Көмүс,сылаас,күн кэрчик,
Күндү кэмим - САЙЫЛЫК.

10.10.2020
Татыйык Мыла.