Брейн-ринг

http://youtu.be/O_hDkGX47VA?si=oIwFhhiYEaC9Joiv 

Муус устар 27 күнэ саха норуотун историятыгар ураты суолталаах бэлиэ күн. 1922 сыллаахха бу күн саха норуотун чулуу уолаттара Былатыан Ойуунускай, Максим Аммосов, Исидор Барахов Саха сирэ автономия буоларын ситиспиттэрэ. Ол саха омуга сайдыытыгар улахан төһүү күүс, бигэ тирэх буолбута.
Муус устар 27 күнүгэр нэһилиэкпитигэр Саха Өрөспүүбүлүкэтин күнүнэн үгэскэ кубулуйбут брейн – ринг өй оонньуута ыытылынна. Оонньууга уопсайа нэһилиэкпит өркөн өйдөөхтөрө, киэҥ билиилээхтэрэ - 7 хамаанда кыттыыны ыллылар: “Току-току ньээм-ньээм” Кеша Алексеев аатынан Хаптаҕай орто оскуолатын үөрэнээччилэрин хамаандата, “Дьулуур” эдэр ыччаттар, “Иэйии” литературнай түмсүү, “Тобулуоскалаах”, “Кэскил”, “Сайдыы”, “Тииттээх” түөлбэлэр хамаандалара.
Балаһыанньаҕа этиллибитинэн, оонньуу 4 теманы хабан ыытылынна. Саха сирин сайдыытын историятыгар, нэһилиэкпит биллиилээх дьонун бэлиэ дааталарыгар Е.И. Новгородова төрөөбүтэ 95, В. Е. Орлов төрөөбүтэ 85, В. И. Захаров төрөөбүтэ 80 сылларыгар туһуланна.
Оонньуубут олус интэриэһинэйдик, тыҥааһыннаахтык ааста. Хамаандалар киэҥ билиилээхтэрин, бэлэмнээхтэрин көрдөрдүлэр.
Оонньуу түмүгүнэн:
I миэстэ - “Тииттээх” түөлбэ хамаандата
II миэстэ - “Сайдыы” түөлбэ хамаандата
III миэстэ - “Иэйии” литературнай түмсүү хамаандата
Кыайыылаахтар дипломнарынан, бириистэринэн наҕараадаланнылар.
Хамаандалар оонньуу түмүгүнэн бэйэлэрин санааларын эттилэр, уопсай хаартыскаҕа түһэн тарҕастылар.
Ыллыктаах санаанан салайтаран, кэскиллээх суолу тутуһан, нэһилиэкпит сайдарын туһугар бары түмсүүлээх буолуоҕуҥ