Үрүҥ тунах ыһыах

Хаптаҕайга Үрүҥ тунах ыһыах
Нэһилиэкпит ыһыаҕа быйыл бэс ыйын 15 күнүгэр ыытылынна.
«Лааҕыр кырдала» ыһыахтыыр түһүлгэбит ыалдьыттарынан, дьонунан ситэри симэннэ, түптэ сытынан, оҕо-аймах күлүүтүнэн туолан, киһи сүргэтэ көтөҕүллэн, бу барыта ыһыах тэрээһинигэр күүс — көмө буолла.
Ыһыах маанылаах ыалдьыттарын түһүлгэҕэ киириигэ маҥан халадаайдаах далбардар үөрэ көрүстүлэр. Ыһыах аһыллыытын сиэрэ- туома оҥоһуллан, алгыс түһэн, кымыс үрдүн охторуу, оһуохай тэрилиннэ. Ыалдьыттары ыһыах маанылаах астарынан күндүлээтилэр.
Кыайыы 80 сылынан Кеша Алексеев аатынан Хаптаҕай орто оскуолатын 6 кылааһын үөрэнээччилэрэ (Салайааччы - Светлана Анатольевна Кокорева) Уйбаан Нуолур "Саллаат оҕото Чооруона" айымньытын оонньоон көрдөрдүлэр.
Ыһыах үөрүүлээх чааһыгар баһылык Иван Прокопьевич Зыков, солбуйааччы Георгий Валерьевич Никифоров наҕараадалары туттартаатылар.
Ыһыах эҕэрдэ кэнсиэригэр эстрада сулустара, маанылаах куоластаахтара Павел Семенов, Петр Кулаковскай, Амикан ылбаҕай ырыаларынан сэргэхситтилэр.
Биир ураты киэргэлинэн Хаптаҕайбыт уран тарбахтаахтарын быыстапката буолла. Биир дойдулаахтарбыт, ыалдьыттар сэргэх үлэлэри көрөн астыннылар, дуоһуйдулар.
Ыһыах биир сүрүн көрүҥүнэн аймахтарынан түмсүү, кэпсэтии, түһүлгэлээн аһааһын.
Бу күн 3 түһүлгэнэн араас күрэхтэр ыытылыннылар. Ол курдук, "Саха буолан сандаар" саха таҥаһын көрүү күрэх, "Күөх сайыны хоһуйуу", "Улуу Кыайыы 80 сылынан" темалардаах аһаҕас ырыа күрэҕэ, Иван Егорович Ефимов – Чабырҕах Уйбаан аатынан чабырҕах күрэҕэ, кыргыттарга "Толбоннурар уһун суһуох" күрэх сэргэхтик ыытылыннылар.
Күн иккис аҥарыгар ыһыах көрө - нара, сымсалар, быһыйдар күөн-күрэстэрэ тэрилиннэ. Илии — атах күрэхтэһиилэрэ ыһыылаах — хаһыылаах, буоларын курдук элбэх көрөөччүлээх буолла.
Киэһээ өттүгэр үгэскэ кубулуйбут Ат сүүрдүүтэ бэрт сэргэхтик ааста.